اوپگور کی خدمات اور تاریخ ناروے ریڈ کراس
رپورٹ: مبارک شاہ (بیورو چیف ناروے ہفت روزہ لاہور انٹرنیشنل)
اوپگور، 3 دسمبر 2025ء — Oppegård Røde Kors نے اپنی 80 سالہ خدمات کا سنگِ میل کولبن کلچر ہاؤس میں ایک پروقار تقریب کے ساتھ منایا۔ اس موقع پر مختلف شعبوں سے تعلق رکھنے والے افراد، سابقہ اور موجودہ رضاکاروں، اور مقامی رہائشیوں نے بڑی تعداد میں شرکت کی۔ جماعت احمدیہ ناروے کے مقامی نمائندگان کو بھی مدعو کیا گیا جن میں مربی سلسلہ عبدالہادی مسعود، صدر جماعت نصیر ظفر، خالد محمود ملک اور مبارک شاہ شامل تھے۔
ہال میں گرمجوشی اور تشکر کی فضا نمایاں رہی۔ مہمانوں نے کافی، کیک اور دیگر ہلکی ضیافت کے ساتھ ریڈ کراس کی مقامی شاخ کی آٹھ دہائیوں پر محیط خدمات کو یاد کیا اور اپنے تجربات ایک دوسرے کے ساتھ شیئر کیے۔ مقررین نے خطابات میں ریڈ کراس کے بنیادی اصولوں—انسانیت، غیر جانب داری، خدمت اور رضاکاریت—پر روشنی ڈالی اور Oppegård Røde Kors کے کردار کو سراہا، جس نے جنگِ عظیم دوئم کے بعد بحالی کے مراحل سے لے کر آج کی جدید ہنگامی امداد اور سماجی بہبود تک ہر دور میں اہم خدمات انجام دیں۔
تقریب میں بزرگ رضاکاروں کے تجربات اور نئی نسل کے متاثر کن جذبات نے ماحول کو مزید معنویت بخشی۔ شاخ نے آئندہ برسوں کے لیے اپنے فلاحی اہداف بھی پیش کیے جن میں سماجی تنہائی کے خاتمے، مقامی ہنگامی امداد کو مضبوط کرنے اور نوجوانوں میں رضاکارانہ سرگرمیوں کے فروغ جیسے منصوبے شامل ہیں۔
مربی سلسلہ عبدالہادی مسعود نے اس موقع پر مختصر خطاب کرتے ہوئے تمام شرکاء کو مبارک باد پیش کی اور قرآن کریم کی وہ آیت بیان کی جس میں مشترکہ انسانی اقدار پر جمع ہونے کی دعوت دی گئی ہے۔ انہوں نے Humanity First کے 30 سال مکمل ہونے کا ذکر بھی کیا اور بتایا کہ اس کے بانی حضرت مرزا طاہر احمدؒ نے اسی جذبۂ خدمتِ انسانیت کے تحت اس ادارے کی بنیاد رکھنے کی تحریک دی تھی۔ آخر میں انہوں نے یہ پیغام دیا کہ جماعت احمدیہ ہر اس قدم میں ساتھ کھڑی ہے جو انسانیت کی بھلائی کے لیے اٹھایا جائے ہم اس میں آپ کے شانہ بشانہ کھڑے ہیں۔
ناروے ریڈ کراس کی تاریخ — ایک مختصر جائزہ
ناروے میں ریڈ کراس کی بنیاد 1865ء میں رکھی گئی۔ ابتدا میں یہ ادارہ جنگی زخمیوں کی امداد اور نرسنگ ٹریننگ تک محدود تھا، مگر وقت کے ساتھ اس کی سرگرمیوں نے فلاحی اور سماجی میدانوں میں نمایاں وسعت اختیار کی۔
دوسری جنگ عظیم کے دوران ناروے ریڈ کراس نے شہریوں کی طبی مدد، خوراک و لباس کی فراہمی اور بحالی کے متعدد پروگرام منظم کیے۔ بعد ازاں 1950 سے 1980 کے دوران ہیلپ کورپس، نوجوانوں کی تربیت، فرسٹ ایڈ، بزرگوں کی معاونت اور سماجی تنہائی کے خاتمے جیسے پروگرام بڑے پیمانے پر فروغ پاتے رہے۔ گزشتہ تین دہائیوں میں ادارے نے ریسکیو کورپس، پناہ گزینوں کی مدد، ذہنی صحت کے پروگرام، نوجوانوں کی تربیت اور بین الاقوامی انسانی امداد کو جدید خطوط پر استوار کیا۔ آج ناروے ریڈ کراس ایک لاکھ سے زائد رضاکاروں پر مشتمل ایک فعال قومی ادارہ ہے۔
Oppegård Røde Kors کی 80 سالہ تقریب نہ صرف مقامی شاخ کے تاریخی سفر کا اعتراف تھی بلکہ ناروے بھر میں ریڈ کراس کی ایک صدی کے قریب خدمات کا عملی نمونہ بھی۔ تقریب نے اس حقیقت کو واضح کیا کہ انسانی ہمدردی، یکجہتی اور خدمت کے یہ سلسلے آئندہ نسلوں تک جاری رہیں گے۔
نوٹ: یہ تحریر مضمون نگار کے اپنے خیالات اور رائے پر مبنی ہے جس سے ادارے کا متفق ہونا ضروری نہیں۔