پاکستانی سفیر ناروے سے نمائندہ لاہور کی ملاقات

رپورٹ: نمائندہ ناروے۔ہفت روزہ لاہور انٹرنیشنل

اوسلو (نمائندہ خصوصی: مبارک شاہ) — ناروے میں پاکستان کی سفیر سعدیہ الطاف قاضی صاحبہ سے ناروے کی صوبائی اسمبلی کی رکن عطیہ مرزا اور معروف سماجی کارکن مبارک شاہ نے ایک اہم ملاقات کی۔ یہ ملاقات ایک گھنٹے سے زائد جاری رہی، جس میں ناروے میں مقیم پاکستانی کمیونٹی کو درپیش مسائل اور ان کے ممکنہ حل پر تفصیلی تبادلۂ خیال کیا گیا۔

گفتگو کے دوران خواتین کے مسائل، نوجوانوں کی تعلیم و تربیت، ملکی سیاست میں حصہ داری، میڈیا میں نمائندگی اور کاروباری مواقع جیسے اہم موضوعات زیرِ بحث آئے۔ شرکاء نے اس بات پر اتفاق کیا کہ پاکستانی کمیونٹی کے مختلف طبقات جو اپنی اپنی سطح پر مسائل کے حل کے لیے سرگرم ہیں، انہیں ایک مشترکہ پلیٹ فارم پر متحد ہو کر ایک واضح لائحۂ عمل ترتیب دینا چاہیے تاکہ زیادہ مؤثر اور دیرپا نتائج حاصل کیے جا سکیں۔
سفیرِ پاکستان سعدیہ الطاف قاضی صاحبہ نے ناروے میں پاکستانی کمیونٹی کے لیے اپنی کاوشوں اور ناروے کی حکومت کے ساتھ تعمیری تعاون کی تفصیل سے آگاہ کیا۔ انہوں نے بتایا کہ وہ مختلف اداروں اور تنظیموں سے مستقل رابطے میں رہتی ہیں جو بین الاقوامی یکجہتی، معیشت اور سلامتی کے امور پر کام کر رہی ہیں۔

صوبائی اسمبلی کی رکن عطیہ مرزا صاحبہ نے ملاقات کے دوران اپنی تجاویز اور کمیونٹی میں جاری سرگرمیوں سے آگاہ کیا۔ انہوں نے زور دیا کہ سفارت خانہ ایسے موضوعات پر بھی روشنی ڈالنے میں کردار ادا کرے جو عمومی طور پر نظرانداز یا ممنوع سمجھے جاتے ہیں، مثلاً جسمانی و ذہنی صحت، اور نوجوانوں کے لیے روایتی پیشوں (ڈاکٹر، انجینئر، وکیل) سے ہٹ کر متبادل تعلیمی مواقع کو فروغ دینا۔

عطیہ مرزا صاحبہ نے ایک عملی تجویز بھی پیش کی کہ پاکستان اور ناروے کے نوجوانوں کے مابین ثقافتی تبادلوں کے پروگرام شروع کیے جائیں۔ ان کے مطابق ایسے پروگرام نوجوانوں کو پاکستان کی زبان، تاریخ اور ثقافت سے آگاہ کرنے کے ساتھ ساتھ ناروے میں اپنی زندگی اور دلچسپیوں کو بھی مثبت انداز میں جوڑنے میں مددگار ثابت ہوں گے۔ انہوں نے کہا کہ اس ضمن میں پاکستانی حکام کی ذمہ داری ہے کہ وہ ان پروگراموں کے لیے محفوظ ماحول فراہم کریں۔ سفیر صاحبہ نے اس تجویز کو نہایت مثبت انداز میں سراہا۔

ملاقات کے اختتام پر شرکاء نے اس بات پر اطمینان کا اظہار کیا کہ یہ نشست نہایت کامیاب، بامقصد اور حوصلہ افزا رہی۔ کمیونٹی رہنماؤں نے کہا کہ باہمی رابطے، اجتماعی کوششوں اور مثبت سوچ کے ذریعے پاکستانی کمیونٹی کے مسائل کو زیادہ بہتر اور مؤثر انداز میں حل کیا جا سکتا ہے۔

سفیرِ پاکستان سعدیہ الطاف قاضی صاحبہ اپنی ہمدردی، خوش اخلاقی اور کمیونٹی سے قریبی تعلقات کی وجہ سے ناروے میں ایک ہر دلعزیز سفیر کی حیثیت رکھتی ہیں، جو ہمیشہ پاکستانی کمیونٹی کے مسائل کے حل اور ان کی بہتری کے لیے سرگرمِ عمل رہتی ہیں۔

نوٹ: یہ تحریر مضمون نگار کے اپنے خیالات اور رائے پر مبنی ہے جس سے ادارے کا متفق ہونا ضروری نہیں۔